Қарори Ҳукумати ҶТ аз 17.04.1998, №122

ҲУКУМАТИ ҶУМҲУРИИ ТОҶИКИСТОН
ҚАРОР

«Дар бораи шароити пардохти музди
меҳнати кори кормандони соатбайъ ва дар ду (чанд)
ҷой коркунандаи корхонаҳои Ҷумҳурии Тоҷикистон»

Бо мақсади фароҳам овардани шароит ба коргарон ва хизматчиён барои иштироки иловагӣ дар истеҳсолоти ҷамъиятӣ ва баланд бардоштани таъминоти моддии кормандон, Ҳукумати Ҷумҳурии Тоҷикистон қ а р о р  м е к у н а д :
1. Аз 1 апрели соли 1998 барои кормандони корхонаҳои Ҷумҳурии Тоҷикистон:
- шароити кор оид ба кори муштараки кормандон мувофиқи замимаи №1 қарори мазкур;
- шароити пардохти кори соатбайъи кормандони корхонаҳо мувофиқи замимаи № 2 тасдиқ карда шавад.
2. Шароити пардохти музди меҳнати кори кормандони соатбайъ ва дар ду (чанд) ҷой коркунанда дар ҳамаи корхонаҳои Ҷумҳурии Тоҷикистон новобаста аз шакли хусусият ва намуди фаъолияташон паҳн карда шавад.
3. Вазоратҳо ва муассисаҳо, раисони вилоятҳо, шаҳрҳо ва ноҳияҳои Ҷумҳурии Тоҷикистон оид ба ин тартиби кори муштарак муқарраршуда назоратро пурзўр намуда ва шахсоне, ки ин тартибро вайрон мекунанд, ба ҷавобгарии сахт кашида шаванд.
 
           Раиси Ҳукумати
    Ҷумҳурии Тоҷикистон                                                                                   Э. Раҳмонов
              ш. Душанбе
 17 апрели соли 1998, № 122

ҲУКУМАТИ ҶУМҲУРИИ ТОҶИКИСТОН
ҚАРОР

«Дар бораи ворид намудани тағйирот ба замимаҳои қарори
Ҳукумати Ҷумҳурии Тоҷикистон аз 17 апрели соли 1998 № 122»

Мувофиқи моддаи 43 Қонуни Ҷумҳурии Тоҷикистон «Дар бораи санадҳои меъёрии ҳуқуқи» Ҳукумати ҷумҳурии Тоҷикистон қарор мекунад:
Ба замимаҳои қарори Ҳукумати Ҷумҳурии Тоҷикистон аз 17 апрели соли 1998 № 122 «Дар бораи шароити пардохти музди меҳнати кори кормандони соатбайъ ва дар ду (чанд) ҷой коркунандаи корхонаҳои Ҷумҳурии Тоҷикистон» тағйироти зерин ворид карда шаванд:
1. Сархати якуми банди 2 Шароити кор оид ба кори муштараки кормандони корхонаҳои Ҷумҳурии Тоҷикистон (замимаи № 1) дар таҳрири зайл ифода карда шавад:
«2. Кори муштарак ба кормандони корхонаҳо, муассисаҳо ва дигар ташкилотҳо новобаста аз шакли моликият иҷозат дода мешавад. Шахсони ишғолкунандаи мансабҳои ҳокимияти давлатӣ ва хизмати давлатӣ наметавонанд ба кори дигари музднок, ба истиснои фаъолияти илмӣ, эҷодӣ ва омўзгорӣ, машғул шаванд. Ба шахсони синнашон то 18, занҳои ҳомила, ҳамчунин дар корҳои дорои шароити меҳнатии зарарнок, агар кори асосӣ низ ҳамин гуна шароитро дошта бошад, кори муштарак иҷозат дода намешавад».
2. Ҷадвали № 1 замимаи № 2 дар таҳрири зерин ифода карда шавад:
«Андозаи музди меҳнати соатбайъ барои гузаронидани машғулиятҳои таълимӣ:
1. «Андозаи музди меҳнати соатбайъ барои гузаронидани машғулиятҳои таълимӣ дар муассисаҳои таҳсилоти умумӣ (ибтидоӣ, умумии асосӣ, миёнаи умумӣ), таҳсилоти ибтидоии касбӣ, миёнаи қасбӣ, олии касбӣ, ба аспирантҳо ва шунавандагони курсҳо ба андозаи музди меҳнати соатбайъи омўзгорони штатии ин муассисаҳо баробар муайян карда мешавад.
2. Андозаи музди меҳнати соатбайъ барои гузаронидани машғулиятҳои таълимӣ дар муассисаҳои таълимии соҳавии азнавтайёркунӣ ва такмили ихтисос дар асоси созишнома бо мутахассиси даъватшаванда муайян карда мешавад».
 
          Раиси Ҳукумати
      Ҷумҳурии Тоҷикистон                                                                                  Эмомалӣ Раҳмон

              ш. Душанбе
аз 2 апрели соли 2009 , № 215

Замимаи 1
ба қарори Ҳукумати
Ҷумҳурии Тоҷикистон
 аз 17 апрели соли 1998 №122

ШАРОИТИ
кор оид ба кори муштараки кормандони корхонаҳои
Ҷумҳурии Тоҷикистон

1. Кори муштарак зимни кори асосӣ, дигар вазифаҳо дар корхона, дар муассисаҳо ва ташкилотҳо баробари иҷрои кори асосӣ - дигар кори муздаш мунтазам пардохташаванда машғулияти яквақта мебошад. Кори муштарак танҳо дар вақти холӣ аз кори асосӣ иҷозат дода мешавад: то саршавии он, бади анҷоми кор, ё дар рўзҳои бо кори асоси банд набудан - рўзҳои истироҳат ва ид, фориғи дар давраи истироҳти байни вахтагӣ, қисми рухсатии меҳнатӣ ва ғайра. Ба кормандони педагогӣ, тиб, ветеринарӣ кори муштарак дар доираи рўзи корӣ иҷозат дода мешавад.
2. Кори муштарак ба кормандони корхонаҳо, муассисаҳо ва дигар ташкилотҳо новобаста аз шакли моликият иҷозат дода мешавад. Шахсони ишғолкунандаи мансабҳои ҳокимияти давлатӣ ва хизмати давлатӣ наметавонанд ба кори дигари музднок, ба истиснои фаъолияти илмӣ, эҷодӣ ва омўзгорӣ, машғул шаванд. Ба шахсони синнашон то 18, занҳои ҳомила, ҳамчунин дар корҳои дорои шароити меҳнатии зарарнок, агар кори асосӣ низ ҳамин гуна шароитро дошта бошад, кори муштарак иҷозат дода намешавад.
Дар як вақт ишғол намудани ду вазифаи роҳарикунанда (ба ғайр аз вазифаҳои устоҳо) агар қонунгузорӣ дигареро муқаррар накарда бошад, иҷозат дода намешавад. Ба вазифаҳои роҳбарикунанда вазифаҳои роҳбарони корхонаҳо, нонобаста аз шакли моликият ва шакли фаъолият, шўъбаҳо, сехҳо, бахшҳо ва ғайра, муовинони онҳо тааллуқ доранд. Дар баробари он ин маҳдудият наметавонад ягон роҳбарро аз ҳуқуқи кор кардан дар вазифаҳои оддӣ маҳрум намояд.
Кори муштарак ҳамчун тадбири мувақатӣ бо тартиби хориҷ, танҳо ба шахсони дорои таҷрибаи калон ва тахассуси баланд ба шарте иҷозат дода мешавад, ки агар имконияти иваз намудани вазифаи холӣ бо корманди соҳиб тахассуси мувофиқ, ки бо кори дигар банд набошад ва агар дар кори муштарак рўзи пурраи корӣ талаб карда нашавад.
3. Корфармо метавонад кормандро барои кори муштарак бо розигии ў танҳо дар ҳудуди на зиёдтар аз нисфи вақти мўътадили корӣ даъват намояд. Тавре, ки танаффуси рўзмарра (байни бастҳо) барои истороҳат на камтар аз 12 соат давом дошта бошад. Кори муштарак сари вақт (то оғози кор) бояд бо фармони (фармоиши) роҳбари корхона, муассиса, ташкилот ё шахсӣ ба он ваколатдор аз рўи пешниҳоди шиносномаи (билети ҳарбӣ) корманд ба расмият дароварда шавад. Аммо, агар шахс ба кори дониши махсус талабкунанда қабул карда шавад, корфармо ҳуқуқ дорад, дар бораи маълумоти гирифта ё омодагии касбӣ диплом ё ҳуҷҷати дигар талаб намояд.
4. Роҳбари корхона новобаста аз шакли моликият ва намуди фаъолият бо мувофиқаи кумитаи иттифоқи касаба ҳуқуқ дорад, дар кори муштарак нисбати кормандони алоҳидаи касбӣ ва вазифаҳо бо шароити махсус ва низоми меҳнат, ки кори иловагӣ ба саломатии онҳо ё бехатарии истеҳсолот зарар мерасонад, маҳдудиятҳо ҷорӣ намояд.